રાજકોટ ખાતે વિવિધ વિકાસ કામોના લોકાર્પણ પ્રસંગે મુખ્યમંત્રી વિજય રૂપાણીએ જણાવ્યું હતું કે કોરોનાની ત્રીજી સંભવિત લહેરનો સામનો કરવા માટે રાજ્ય સરકાર સંપૂર્ણ સજ્જ અને સજાગ છે. રોજ 3 લાખ નાગરિકોનું વેક્સિનેશન કરવા રાજ્ય સરકાર પ્રયત્નશીલ છે. તેમણે જણાવ્યું હતું કે, કોરોનાની બીજી લહેર લગભગ નિયંત્રિત થઈ ગઇ છે અને કેસોમાં ઘટાડો થઇ રહ્યો છે ત્યારે લોકોએ પણ આગળ આવીને વેક્સિનેશન જરૂર કરાવવું જ જોઈએ. સાથે જ સીએમ રૂપાણીએ જણાવ્યું હતું કે, રાજ્ય સરકારે કોરોના અટકાવવાની કામગીરીની સાથે વિકાસ કામોની ગતિ પણ અવિરતપણે ચાલુ રાખી છે. તેમણે કહ્યું કે, કોરોનાના છેલ્લા દોઢ વર્ષના કપરા કાળમાં પણ રાજ્ય સરકારે અંદાજે રૂ. ૩૦ હજાર કરોડથી વધુ રકમના વિકાસ કામો રાજ્યની જનતાને સમર્પિત કર્યા છે.
મુખ્યમંત્રી વિજય રૂપાણીએ આજે પ્રમુખસ્વામી ઓડિટોરિયમ ખાતે રૂ. 232,50 કરોડના વિવિધ પ્રોજેક્ટસનું ઈ-લોકાર્પણ કર્યું હતું. જેમાં રાજકોટ મહાનગરપાલિકા દ્વારા પ્રધાનમંત્રી આવાસ યોજના અંતર્ગત રૂ. 118 કરોડના ખર્ચે બનેલા લાઈટ હાઉસ પ્રોજેક્ટના આવાસ યોજનાનો ઈ ડ્રો, રાજકોટ શહેરી વિકાસ સત્તામંડળ દ્વારા રૂપિયા 67.63 કરોડના ખર્ચે નિર્માણ થનાર પ્રધાનમંત્રી આવાસ યોજનાનો ઈ ડ્રો, રૂ. 37.69 કરોડના ખર્ચે જુદા જુદા વૉર્ડમાં થનારા વિકાસ કામોના ઈ-લોકાર્પણ તથા ઈ-ખાતમુહૂર્ત અને રૂ. 9.18 કરોડના ખર્ચે રૂડા વિસ્તારમાં થનારા વિકાસકામોના ખાતમુહુર્તનો સમાવેશ થાય છે.