ગુજરાતમાં 8 પેટાચૂંટણીના પરિણામોનું ચિત્ર લગભગ સ્પષ્ટ છે અને તેમાં ભાજપ વિજયી થઈ રહ્યું છે ત્યારે ગુજરાતના મુખ્યમંત્રી વિજય રૂપાણી અને પ્રદેશ પ્રમુખ સી.આર. પાટીલે પ્રેસ કૉન્ફરન્સ કરીને માહિતી આપી હતી. સીએમ રૂપાણીએ પેટાચૂંટણીના પરિણામ પર પોતાની લાગણી વ્યક્ત કરતા રૂપાણીએ જણાવ્યું કે, સર્વત્ર ભાજપનો વિજય થઈ રહ્યો છે. આ ગુજરાતની જનતાનો વિજય છે. બિહારમાં પણ ભાજપ આગળ છે. ભાજપના કાર્યકરોએ કઠિન પરિશ્રમ કર્યો છે આ તેનું પરિણામ છે. ભાજપ સરકારે પ્રજાલક્ષી કામ કર્યા છે. પીએમ નરેન્દ્ર મોદીના પ્રજાલક્ષી કામ પર લોકોએ ભરોસો મૂક્યો છે. તેમણે કોંગ્રેસ પર આક્ષેપ કરતા જણાવ્યું કે, હવે કોંગ્રેસની કબર પર છેલ્લો ખિલ્લો ઠોકવાની આ છેલ્લી ચૂંટણી છે. કોંગ્રેસનો સંપૂર્ણ રકાસ થયો છે. ભાજપ સાથે આદિવાસી, મુસ્લિમ સમાજ સાથે રહ્યો છે. ભાજપે જીત નહીં, પણ ભવ્ય જીત મેળવી છે.
સીએમ રૂપાણીએ ઉમેર્યું કે, કોર્પોરેશન, પંચાયત અને 2022 પહેલાનું આ ધમાકેદાર ટ્રેલર છે. આગામી સ્થાનિક સ્વરાજની ચૂંટણીઓ માટે આ માત્ર ટ્રેલર છે. ડાંગના ઈતિહાસમાં ભાજપને સૌથી મોટી લીડ મળી છે. આવનારા દિવસોમાં હવે ભાજપના 111 ધારાસભ્યો થઈ જશે, પ્રજા જાણે છે અને તેના કારણે જ કૉંગ્રેસની આવી હાલત છે. પેટાચૂંટણીના આ પરિણામો વર્ષ 2022માં યોજાનારી વિધાનસભાની ચૂંટણીનું ટ્રેલર છે. આગામી જિલ્લા પંચાયતો, તાલુકા પંચાયતો, મહાનગર પાલિકાની ચૂંટણીનું આ પરિણામ છે. કૉંગ્રેસે આ ચૂંટણીમાં ખૂબ આક્ષેપો કર્યા છે પરંતુ પ્રજાએ કૉંગ્રેસને સ્થાન દેખાડી દીધું છે. અમે ફક્ત જીત્યા નથી જંગી બહુમતીથી ચૂંટણી જીત્યા છીએ”
ભાજપની ટીકા કરનારે જનતાએ જવાબ આપી દીધો: સીઆર પાટીલ
પેટાચૂંટણીના પરિણામ પર પ્રદેશ અધ્યક્ષ સીઆર પાટીલે સૌ પ્રથમવાર મતદારોનો આભાર માન્યો હતો અને કહ્યું હતું કે, ભાજપની ટીકા કરનારને જનતાએ આજે જવાબ આપી દીધો છે. વિશ્વાસને કારણે ભાજપની જીત થઈ છે. પરંતુ ભાજપની ભવ્ય જીત થઈ છે. કોંગ્રેસમાં ટ્વીટી જમાત ભેગી થઈ છે. કોઈ એક મુદ્દા પર ચૂંટણી જીતી શકાતી નથી. પરંતુ અમે પેજ કમિટિને ખૂબ મહત્ત્વ આપ્યું હતું. અમે લોકો સુધી પહોંચવા માટે લોકો સુધી યોજનાઓનો લાભ પહોંચાડવો અને કાર્યકર્તાઓએ જે મહેનત કરી છે તે ખૂબ મહત્ત્વનો ભાગ છે. વડાપ્રાન મોદીનો જે કામ કરવાની પદ્ધતિ છે. તેમના દ્વારા બનેલી યોજનાઓ દરેક તબક્કાને મળે તેવું કામ કર્યુ છે. મતદારો સાથે સંપર્ક કરવામાં કાર્યકરોએ જે કામ કર્યુ છે તેનું આ પરિણામ છે”